DUGGARI HERRAPEYSA

Peysan er með áferðarmynstri á berustykki en er einföld að öðru leyti. Hún minnir á sjómannapeysur fyrri tíma og fékk því nafnið Duggari. Klassísk í sniði og kemur vel út í margs konar garni, hlý en ekki of þykk og passar við allt.

Prjónað er frá hálsmáli og niður. Í fyrstu er prjónað mynsturprjón fram og til baka til að móta hálsmál en síðan tengt í hring. Laskalykkjur skilja að ermar og bak- og framstykki, og er aukið út frá þeim niður berustykkið. Eftir að berustykki er lokið er peysan prjónuð með sléttu prjóni. Í lokin eru teknar upp lykkjur í hálsmáli til að prjóna stroff. Auðvelt er að aðlaga sídd og ermalengd að þörfum notandans.

Stærðir: 1 – 2 – 3 – 4 – 5 – 6 – 7 / Bolvídd peysu 99 – 106 – 110 – 114 – 119 – 126 – 130 sm.

Prjónfesta: 18 lykkjur og 24 umferðir í sléttu prjóni = 10×10 sm.

Prjónar: Langir og stuttir hringprjónar nr 4 og 5, sokkaprjónar nr. 4 – eða sú stærð sem gefur rétta prjónfestu. Ef töfralykkja er notuð þarf ekki sokka- og ermaprjóna.

Garn: Margar garntegundir koma til greina í þessa peysu. Peysan á myndinni er prjónuð úr Cascade 220 (100 gr = 200 m). Garnþörf u.þ.b. 1000 – 1100 – 1150 – 1200 – 1250 – 1350 – 1400 m (til viðmiðunar).

Erfiðleikastig: 2 af 5. Meðal annars er eftirfarandi tækni beitt: Útaukning og úrtaka til hægri og vinstri, einfalt áferðarmynstur, lykkjur teknar upp í hálsmáli. Mynsturteikning sem sýnir útaukningar, helstu skýringar og vísun á leiðbeiningamyndbönd eru í uppskriftinni. 

Við kaup á uppskrift færð þú tölvupóst með hlekk á pdf skjal til niðurhals. Um leið og smellt er á hlekkinn hleðst skjalið sjálfkrafa niður. Stundum þarf að leita í Niðurhal/Downloads möppunni eða Skrárnar mínar/My Files möppunni til að finna það. Niðurhal er takmarkað við fjögur skipti.