FJÖLSKYLDUHÚFAN

Fjölskylduhúfan er fremur einföld og fljótprjónuð en með smá tvisti sem gerir hana áhugaverða. Hún er góð fyrir börn sem fullorðna og öll kyn.
Prjónað er frá stroffi og upp, byrjað á ítölsku uppfiti og snúnum sléttum lykkjum í stroffi en svo skipt yfir í einfalt mynstur. Prjónaðar eru nokkrar úrtökuumferðir á efri hluta húfunnar þannig að hún situr vel á höfðinu.

Stærðir/höfuðmál:
2-4 ára (um 48-50 sm) – 5-10 ára (um 51-55 sm) – S-M (um 56-58 sm) – L-XL (um 59-62 sm).

Prjónafesta: 17 lykkjur og 23 umferðir í sléttu prjóni = 10×10 sm.

Prjónar: Stuttir hringprjónar og sokkaprjónar nr. 4,5 og 5 eða sú stærð sem þarf til að ná prjónafestu. Ef töfralykkja er notuð þarf langa hringprjóna í hvorri stærð.

Garn: Margar garntegundir koma til greina í húfuna. Húfurnar á myndunum eru prjónaðar úr tveim þráðum af Babyull Lanett frá Sandnes (brún húfa), einum þræði af Dale Lerke með einum þræði af Midnatssol frá CaMaRose (ljós húfa) og úr Drops Nepal (Grá húfa).

Garnþörfin veltur á því hvaða garn er valið en gera má ráð fyrir á bilinu 80-110 metrum í allar stærðir.

Erfiðleikastig: 1-2 af 5. Meðal annars er eftirfarandi tækni beitt: Ítalskt uppfit, snúin sl, 2 prj saman. Skýringar og vísun á leiðbeiningamyndbönd eru aftast í uppskriftinni.

Við kaup á uppskrift færð þú tölvupóst með hlekk á pdf skjal til niðurhals. Um leið og smellt er á hlekkinn hleðst skjalið sjálfkrafa niður. Mælt er með að nota tölvu frekar en síma. Stundum þarf að leita í Niðurhal/Downloads möppunni eða Skrárnar mínar/My Files möppunni til að finna skjalið. Niðurhal er takmarkað við tvö skipti.