EMBLA TOPPUR

Emblu toppurinn er kvenlegur og penn með fínlegu útprjóni á berustykki. Ermar eru stuttar og í staðinn fyrir stroff í hálsi, á ermum og bol er prjónað mynstur. Toppurinn er fullkomið vorverkefni því hann má nota einan og sér yfir sumarið en er líka fínn undir jakka eða peysu allan ársins hring og má dressa upp og niður. Hönnunin fylgir engum tískubylgjum og ef valið er að prjóna úr hör (uppgefið garn) mun hann endast í áraraðir.

Prjónað er frá hálsmáli og niður, svo auðvelt er að aðlaga sídd og ermalengd. Berustykkið er prjónað eftir mynsturteikningu og gerð hækkun á baki. Svo er skipt í bol og ermar og prjónað slétt í hring.

Stærðir:  1 – 2 – 3 – 4 – 5 – 6 - 7 - 8. Víddin yfir bol er 78 - 86 - 93 - 99 - 107 - 114 - 120 - 128  sm.  Þegar stærð er valin er best að miða við brjóstmál eða mælingu þar sem notandinn er mestur um sig á búk (brjóstmál/magamál). Sniðið á toppnum gerir ráð fyrir 3-7 sm hreyfivídd. Ef þú ert í vafa um stærð er gott að mæla þunna peysu eða topp sem passar vel á notandann og velja út frá því.

Prjónfesta: 21 lykkja og 31 umferð í sléttu prjóni = 10×10 sm.

Prjónar: Langir og stuttir hringprjónar nr. 3,5- 4 eða sú stærð sem gefur rétta prjónfestu. Ef töfralykkja er notuð þarf ekki sokka- og ermaprjóna. Grófari prjónn til að fitja upp með, t.d. nr. 6-7.

Garn: Lövetand frá CaMaRose (50 gr = 140 m), 100% lífrænn hör. Toppurinn á myndunum er prjónaður í lit 430, Sölv grå. Nota má annað garn með sömu prjónfestu en val á garni hefur áhrif á útlit og eiginleika toppsins, t.d. áferð og þyngd. Við mælum með að velja náttúrulegt garn. Athugið að garnmagn er áætlað og miðast við uppgefið garn og rétta prjónfestu. Það þarf um 200-250 / 250 / 250 / 250-300 / 300 / 300-350 / 350 / 350 g í toppinn.

Erfiðleikastig: 2-3 af 5. Meðal annars er eftirfarandi tækni beitt: Mynsturprjón. Útaukning og úrtaka til hægri og vinstri, þrjár lykkjur prjónaðar saman (tvær aðferðir) og þrjár lykkjur prjónaðar úr einni. Stuttar umferðir. Mynsturteikning sem sýnir útaukningar, helstu skýringar og vísun á leiðbeiningamyndbönd eru í uppskriftinni. 

Við kaup á uppskrift færð þú tölvupóst með hlekk á pdf skjal til niðurhals. Um leið og smellt er á hlekkinn hleðst skjalið sjálfkrafa niður. Mælt er með að nota tölvu frekar en síma. Stundum þarf að leita í Niðurhal/Downloads möppunni eða Skrárnar mínar/My Files möppunni til að finna skjalið. Niðurhal er takmarkað við fjögur skipti.